Poligraf.AL Mē shumē se lajm
Related Articles
30 VITE NGA TUBIMI NË GJONAJ PËR FALEJEN E GJAQEVE
Sot 30 vite me parë në Kodër të Pajtimit në praninë e mbi 350 mijë njerëzve nga e gjithë Kosova u mbajt tubimi për faljen e gjaqeve. Në këtë tubim kontribut të madh dhanë studentët nga Hasi, të cilët iu përgjigjën ndërgjegjes kombëtare. Emrat e të cilëve nuk do t’i përmendi për të mos bërë ndonjë lëshim. Neve na përkrahën edhe shumë profesorë të nderuar, të cilët ishin angazhuar në pajtimin e gjaqeve. Ndër ta mund ta veçoj profesor Anton Çettën, Zekria Canën, Din Mehmetit, Bardhyl Qaushin, Qamil Gexhë, Kajtaz Rrecajn etj.
Në ditën e tubimit, i madh ishte edhe angazhimi i banorëve të fshatit Gjonaj, të cilët në mënyrë madhështore i hapën dyert dhe I shtruan sofrat për të gjithë ata që kishin ardhur për ta përcjellë këtë tubim, ku shtrihej dora e pajtimit.
Pas këtij tubimi madhështor të rinjtë e Hasit u angazhuan që ta ndihmojnë emancipimin e femrës, ku falë këtij angazhimi u themelua Ndërmarrja Botuese “Bogdani”, u hapën dy shkollave të mesme në Gjonaj dhe Romajë, u botuan 20 numra të gazetës “Etja”, gazetës “Të jesh grua” disa numra të “Gazetës letrare” e shumë aktivitete tjera.
Tubimi i Pajtimit të Gjaqeve, në Gjonaj ishte kërkesë e Ukshin Hotit, i cili me grupin tonë mori pjesë në disa pajtime në fshatrat e Hasit. Fjalët e tij, kur shprehej “Ardhmëria e Kosovës është këndej nga Pashtriku, dhe këtë anë duhet ta kemi ballëhapur e pa asnjë ngatërresë.” Dhe vërtetë pas shumë viteve Pashtriku u bë porta e lirisë së Kosovës, ku pos bartjes së armatimit, u zhvilluan betejat, që ia dhënë vulën lirisë së Kosovës, në të cilat beteja pushtuesit serbë pësuan humbjet më të mëdha.
Për këtë vit, pata planifikuar që ta përgatis një monografi për Pajtimin e gjaqeve, por pandemia, nuk ma mundësoi realizimin e këtij projekti, por gjithsesi do ta vazhdojmë sapo të krijohen kushtet dhe mundësitë.
Shkruan Nexhat Çoçaj
